Fréttir allt

Skrifstofa Umhyggju verður lokuð eftir hádegi föstudaginn 26. júní. Hægt er að senda tölvupóst á netfangið info@umhyggja.is og verður honum svarað við fyrsta tækifæri.

Umhyggja – félag langveikra barna hefur ráðið Árnýju Ingvarsdóttur sem framkvæmdastjóra félagsins frá og með 15. júní næstkomandi. Árný er með Cand.Psych. próf í sálfræði frá Háskólanum í Árósum og MA próf í hagnýtri ritstjórn og útgáfu frá Háskóla Íslands. Hún hefur starfað hjá Umhyggju frá árinu 2016 sem sálfræðingur, verkefnastjóri og ritstjóri Umhyggjublaðsins, og hefur frá áramótum gegnt stöðu aðstoðarframkvæmdastjóra félagsins.

Á aðalfundi Umhyggju þriðjudaginn 9. júní létu tveir af stjórnarmeðlimum Umhyggju, þau Regína Lilja Magnúsdóttir og Andrés Ragnarsson, af störfum. Í stað þeirra taka sæti í stjórn þær Guðrún Eygló Guðmundsdóttir sérfræðingur í hjúkrun barna og Margrét Lilja Vilmundardóttir sem lýkur innan skamms embættisprófi í guðfræði. Við bjóðum þær hjartanlega velkomnar og óskum nýrri stjórn gæfu og gengis á komandi stjórnarári.

Aðalfundur Umhyggju verður haldinn í dag, þriðjudaginn 9.júní kl.17:00 á Grand Hótel Reykjavík. Fundinum verður streymt.

Við minnum á aðalfund Umhyggju sem haldinn verður þriðjudaginn 9. júní kl.17:00 á Grand Hótel Reykjavík. Fundinum verður streymt og verður slóð á streymið auglýst á vefsíðunni okkar á morgun, þriðjudag. Við óskum eftir því að fólk skrái sig á fundinn svo hægt sé að áætla fjölda og viðhafa allar öryggisráðstafanir vegna Covid-19.

Í dag voru Umhyggju afhentar 212.000 krónur sem söfnuðust í áheitahlaupi sem krakkarnir í Lindaskóla í Kópavogi tóku þátt í. Verkefnið, sem er orðinn árviss viðburður, kalla þau Börn styrkja börn, en hlaupið kallast Lindaskólaspretturinn. Hringurinn er 1.25 kílómetrar og safna krakkarnir áheitum frá vinum og vandamönnum að upphæð 100 kr. fyrir hvern hlaupinn hring.

Þann 31. mars síðastliðinn sendi Umhyggja frá sér áskorun til stjórnvalda vegna leiðréttingar tekjutaps foreldra langveikra barna sem hafa þurft að vera í verndarsóttkví vegna Covid-19 faraldursins. Þar var þess krafist að þessum hópi væru tryggðar launagreiðslur á meðan á sóttkví stæði, eins og reglugerð sem samþykkt var 21. mars gerði ráð fyrir til handa þeim sem fóru í sóttkví í kjölfar utanlandsferða eða þess að hafa umgengist smitaðan einstakling.Í gær voru samþykktar og birtar á vef félagsmálaráðuneytis breytingar á reglugerð um fjárhagslega aðstoð við framfærendur fatlaðra og langveikra barna. Þar kemur fram að foreldrar langveikra barna sem hafa verið heima með barni vegna undirliggjandi vanda þess, sem landlæknir hefur skilgreint í áhættuhópi fyrir alvarlegri sýkingu vegna Covid-19, geti sótt um eingreiðslu sem nemur 25% af fullum umönnunargreiðslum, fyrir einn mánuð að uppfylltum ákveðnum skilyrðum. Til að setja þetta í samhengi eru fullar umönnunargreiðslur í 1. flokki, 100% (hæsta umönnunarflokki) kr. 192.433, þar af eru 25% kr. 48.108. Umhyggja lýsir yfir vonbrigðum vegna þessarar niðurstöðu.

Við minnum á aðalfund Umhyggju sem haldinn verður þriðjudaginn 9. júní kl.17:00 á Grand Hótel Reykjavík. Við biðjum fólk að skrá sig svo áætla megi fjölda og vekjum auk þess athygli á skýrslu stjórnar sem nú er aðgengileg á vefsíðunni. Tvö stjórnarsæti eru laus og tvö framboð bárust innan framboðsfrestsins.

Ákveðið hefur verið að færa áður auglýstan aðalfundi Umhyggju, sem átti að vera 26.maí, fram til 9. júní kl.17:00. Fundurinn verður á Grand Hotel Reykjavík, alls geta 45 manns sótt fundinn og gerir rýmið ráð fyrir að hægt sé að hafa 2 metra fjarlægð auk þess sem ítrustu sóttvarna verður gætt. Fundinum verður streymt, en athugið að ekki er hægt að greiða atkvæði nema mæta á staðinn. Óskað er eftir að þeir félagsmenn sem hyggjast sitja fundinn skrái sig á vefsíðu Umhyggju svo hægt sé að áætla fjölda og gera ráðstafanir vegan kosningar verði aðsókn mikil. Allar nánari upplýsingar um streymið verða birtar á vefsíðu þegar nær dregur.

Umhyggja, ásamt Greiningar-og ráðgjafarstöð ríkisins, Landssamtökunum Þroskahjálp og Einhverfusamtökunum, hefur sent frá sér grein er varðar fötluð og/eða langveik börn á tímum Covid-19 faraldurs. Er þar lagt til að sveitarfélög og aðrir þjónustuveitendur loki síður, eða stytti lokunartíma úrræða sinna í sumar, til að viðhalda færni barna sem á því þurfa að halda, og til að létta undir með viðvarandi þungu álagi á foreldra um þessar mundir. Einnig mætti tryggja börnum á grunnskólaaldri viðeigandi sumarúrræði og námskeið til að veita þeim kost á virkni og samfélagslegri þátttöku.